عيد ميلادي

نويت انا فـي عيـدك اليـوم اهنيـك
واقول يا نجم السماء الـف مبـروك
زهر البنفسج سارقـن مـن حلاويـك
ولون الزهر في صافي الخد مفـروك
اشوف انا العشـاق لاجلـك مهاليـك
عزيز يا غصنن حمى ورده الشـوك
يا جاعـل الزينـات حولـك مماليـك
وفي عرش راس الزين يا حلو حطوك
نسم الصبا من عاليـة نجـد هاويـك
يمشي يطير ويقطـع البحـر سنبـوك
ارسل معه تبريك قلـب (ن) يحييـك
ولو كان عقد الوصل باليـوم مفكـوك
هـي خيـرة الله تبعـدك ثـم تدنيـك
نفـس الـذي جابـوك بالبعـد ردوك
وما خطاك مالاقدار ماهوب ناصيـك
واللي يصيبن لو تخفيت مـا خطـوك
ولو طالت الايـام مـا نيـب ناسيـك
ما انساك ومانسى ناس بالنسي نسّوك
اشوف انا العذال با الهـرج تشريـك
وفـي قـادم الايـام لازم يبيـعـوك
طاوعت وسواس (ن) يوسّك يحاكيـك
ناس (ن) يسبُّونـي وعنـدي يسبّـوك
اقول يا شمعات كيـك (ن) مشاكيـك
تتوجـت بالنـار مـن سـاع شبّـوك
ياكبـر حظـك يـوم خلّـي يطفيـك
تشوف بِشْر الوجه شعشع به ضْحوك
ناس (ن) تبارك لك وناس(ن) حواليك
وناس (ن) تموت من الحساير تمنـوك
يضيع ليلي ساهـرن بـك واناجيـك
قلبي وروحـي بالخـلا كـم نـادوك
يـا بيـت ياللـي تايهـات معانـيـك
ضاعت حروفك بين الاسطار والبوك
يبكي القلم لا جيـت بابنـي مبانيـك
دموعه على الاسطار بالحس مشروك
يابيـت سلّينـي وانـا مثـل اسليّـك
واحفظ وداد اللي على الصفح خطْوك
لا تعتذر لـي كلمـا جيـت اغنِّيـك
نجوم السماء من حظهـا كـم غنّـوك